ထိုင်း-မြန်မာနယ်စပ်ရောက် မြန်မာရဲအရာရှိတဦး ရဲတပ်သားများဘဝ ရင်ဖွင့်ပြောကြား

သတင်း - ပြည်တွင်းသတင်း သတင်းရင်းမြစ် > ရဲရင့် အင်္ဂါနေ့၊ ဖေဖေါ်ဝါရီလ ၂ ရက် ၂၀၁၀ ခုနှစ်

PDF ဖိုင်ရယူရန် Array ပရင့်ထုတ်ရန် Array အီးမေးလ်ပို့ရန်

မြန်မာနိုင်ငံရဲတပ်ဖွဲ့အတွင်း ကြီးနိုင်ငယ်ညှဉ်း မတရားဖိနှိပ်မှုဒဏ်များကို မခံနိုင်တော့သဖြင့် ကရင်ပြည်နယ်မှ ရဲအရာရှိတဦး ထိုင်း-မြန်မာနယ်စပ်သို့ ထွက်ပြေးရောက်ရှိလာသည်။

ယခုရက်ပိုင်းအတွင်း ရောက်ရှိလာသည့် အဆိုပါ ဒု-ရဲအုပ်က မြန်မာနိုင်ငံရဲတပ်ဖွဲ့သည် စစ်အာဏာပိုင်များ၏ စေခိုင်းချက်အတိုင်း လှုပ်ရှားနေရပြီး ရဲတပ်ဖွဲ့အတွင်း၌လည်း အထက်မှ အောက်ခြေတပ်ဖွဲ့ဝင်များကို နေ့စဉ်ဖိအားပေးမှုများရှိနေသည့်အတွက် တပ်ဖွဲ့ဝင်များ စိတ်ဓာတ်ကျဆင်းနေသည်ဟု ပြောသည်။

၎င်းက “ရဲဆိုတာက ဥပဒေကြောင်းအရ ဘာမှလုပ်ပိုင်ခွင့်မရှိဘူး။ အထက်အမိန့်အတိုင်းပဲ။ ရဲတပ်ဖွဲ့ဆိုတာက စစ်ဘက်အာဏာပိုင် တွေကို ကြောက်ရတယ်။ သူတို့ကဖမ်းဆိုရင် ဖမ်း၊ တားဆိုရင် တားပဲ။ ဘာဆုံးဖြတ်ပိုင်ခွင့်မှ မရှိဘူး” ဟု ပြောသည်။

တဘက်နိုင်ငံသို့ခိုးထုတ်မည့် မြန်မာရှေးဟောင်းဘုရား ဆင်းတုတော်များ အပြည့်တင်ဆောင်လာသည့် ကားတစီးကို စစ်ဆေးတွေ့ရှိခဲ့သော်လည်း မြန်မာစစ်ဗိုလ်ချုပ်တဦး၏ အမိန့်ကြောင့် ပြန်လွှတ်ပေးခဲ့ရသည်ဟုလည်း အဆိုပါ ဒု-ရဲအုပ်ဖြစ်သူက ပြောသည်။

“ဒေသဆိုင်ရာစစ်ဘက်က ဖိအားပေးရာမှာ ကျနော်ဘားအံက သံလွင်တံတားထိပ်မှာ တာဝန်ကျတော့ အလယ်ပိုင်းတိုင်းမှူး ဗိုလ်ချုပ်ကိုကိုရဲ့ ညီမကားနဲ့ ထိုင်းဘက်ပို့မယ်လို့ ယူဆရတဲ့ ရှေးဟောင်းဘုရား ဆင်းတုတော် (၄၇) ဆူ ဖမ်းမိတယ်။ အဲဒါကိုအထက်က မင်းတို့ဘာမှမလုပ်နဲဲ့ ပြန်လွှတ်ပေးလိုက်ဆိုတာနဲ့ ကားကိုပြန်လွှတ်ပေးလိုက်ရတယ်” ဟု ပြောသည်။

အမှုရင်ဆိုင်နေရသည့် တရားခံများကို ဥပဒေအရ အရေးယူထိုက်သော်ငြားလည်း ဒေသဆိုင်ရာ အာဏာပိုင်များ၏အမိန့်ကြောင့် ပြန်လွှတ်ပေးရမှုများလည်း ရှိသည်ဟု သိရသည်။

ရဲဝန်ထမ်းလစာနည်းပါးသဖြင့် အောက်ခြေရဲဝန်ထမ်း မိသားစုဝင်အများစုမှာ တရားမဝင်လောင်းကစားဒိုင်များမှ ပေးသည့် လစဉ်ကြေးများဖြင့် မိသားစုစားဝတ်နေရေးကို ဖြေရှင်းနေရကြောင်း ၎င်းက ဆက်လက်ပြောသည်။

“ဒုရဲအုပ်က လစာကျပ် (၃၃,၀၀၀) ပဲရတယ်။ အများထင်သလို အောက်ဆိုက်တွေ ဘာတွေ ရတယ်ဆိုတာက လူတိုင်း မဟုတ်ပါဘူး။ ရုံးမှာတာဝန်ကျတဲ့လူဆိုရင် ပိုဆိုးပါတယ်။ အောက်ခြေရဲတွေရဲ့ မိသားစုတွေကတော့ (၂) လုံးထီ၊ (၃) လုံးထီ၊ (၁) လုံးထီ ဒိုင်တွေကရတဲ့ အကောက်တွေနဲ့ပဲ ရပ်တည်နေကြရတယ်။ တပ်ဖွဲ့ဝင်အင်အားနည်းတော့ ညဘက်ဆိုရင် စခန်းမှာ ရဲဝတ်စုံဝတ်ပြီး ရဲသား မိန်းမတွေ ညကင်းစောင့်ကြရတယ်” ဟု ထိုရဲအရာရှိက ပြောသည်။

စစ်ဆေးရေးဂိတ်များတွင် တာဝန်ကျပါက ငြိမ်းချမ်းရေးအဖွဲ့ပိုင်ကားများနှင့် မကြာခဏပြဿနာများ ဖြစ်ပွားကြောင်း၊ ပြဿနာ ဖြစ်ပါက ရဲတပ်ဖွဲ့ဝင်များသာ အရေးယူခံရကြောင်း၊ အလားတူဖိနှိပ်မှုဒဏ်များကို ဆက်၍ သီးမခံနိုင်တော့သဖြင့် ထွက်လာခြင်း ဖြစ်ကြောင်း ၎င်းက ပြောသည်။

အဆိုပါ ဒု-ရဲအုပ်က တတိယနိုင်ငံသို့ ထွက်ခွာမည်မဟုတ်ဘဲ မိမိတတ်နိုင်သည့်အင်အားဖြင့် မြန်မာပြည် လွတ်မြောက်ရေးအတွက် ပူးပေါင်းကူညီသွားမည်ဟု ပြောသည်။

စာဖတ်သူ ထင်မြင်ချက်များ

အသစ်ရေးရန်

ရှာဖွေရန်

RSS