သံဃာ့ တပ်ပေါင်းစုနှင့် ဆက်သွယ်သူများကို ထောင်ဒဏ်ချမှတ်

သတင်း - ပြည်တွင်းသတင်း သတင်းရင်းမြစ် > ရန်ပိုင် ဗုဒ္ဓဟူးနေ့၊ ဖေဖေါ်ဝါရီလ ၃ ရက် ၂၀၁၀ ခုနှစ်

PDF ဖိုင်ရယူရန် Array ပရင့်ထုတ်ရန် Array အီးမေးလ်ပို့ရန်

နိုင်ငံရေး လှုပ်ရှား တက်ကြွသူ သံဃာတော် ၃ ပါးနှင့် လူပုဂ္ဂိုလ် ၂ ဦး ကို မကြာသေးခင် ရက်ပိုင်းတွင် စစ်အစိုးရ အင်းစိန်ထောင် အထူး တရားရုံးမှ ထောင်ဒဏ် ၆ နှစ် မှ ၉ နှစ်အထိ အသီးသီး အပြစ်ပေး လိုက်ကြောင်း သိရသည်။

အဆိုပါ နိုင်ငံရေးအကျဉ်းသားများသည် အမှု စစ်ဆေးနေစဉ် အတွင်း မိသားစုများ လာရောက်တွေ့ဆုံနိုင်ခြင်း မရှိကြောင်း၊ ရှေ့နေလည်းငှားရမ်းနိုင််ခြင်း မရှိသည့်အတွက် အမှုကိုအမြန်ဆုံး စီရင်ချက်ချနိုင်ခဲ့ခြင်း ဖြစ်ကြောင်း နိုင်ငံရေး အကျဉ်းသားများ၏ အမှုများကို လိုက်ပါဆောင်ရွက်ပေးနေသည့် ရှေ့နေဦးကျော်ဟိုးက ပြောသည်။

“ ၆နှစ်ကနေ ၉နှစ်အထိ ထောင်ချခံရတယ်လို့ ရုံးချိန်းထွက်တဲ့ နိုင်ငံရေးအကျဉ်းသားတွေက ပြောတယ်”ဟု ၎င်းကဆိုသည်။

ယခုပြစ်ဒဏ်ချခံရသူများကို မြန်မာနိုင်ငံလုံးဆိုင်ရာ သံဃာ့ တပ်ပေါင်းစု၊ မျိုးဆက်သစ်လူငယ်များ အဖွဲ့ စသည့် အသင်းအဖွဲ့များနှင့် ဆက်သွယ်သည့်အတွက် တရားမဝင် အသင်းအဖွဲ့ဆိုင်ရာ ပုဒ်မ ၇၊ နယ်စပ်ဖြတ်ကျော် ဝင်ရောက်မှု ပုဒ်မ ၁၃/၁၊ နိုင်ငံခြားငွေ တရား မဝင်ကိုင်ဆောင်မှုပုဒ်မ ၂၄/၁ ဖြင့် စွဲချက်တင်ခဲ့ခြင်းဖြစ်ကြောင်း ရှေ့နေဦးကျော်ဟိုးက ပြောသည်။

ပြီးခဲ့သည်နှစ် စက်တင်ဘာလအတွင်းက သံဃာတော် ၄ ပါးဖြစ်သည့် ရေနံချောင်းမြို့ ရွှေစေတီ ကျောင်းမှ ဆရာတော် ဦးဝါယမ၊ ပွင့်ဖြူမြို့နယ် လယ်ကိုင်းမြို့မှ ဦးရေဝတ၊ ပခုက္ကူမြို့ သာသနာ့ဝေပုလ္လာရာမ အနောက် တိုက်မှ ဦးဝိသုဒ္ဓနှင့် ဦးဃောသိတ တို့ အပါ အဝင် မန္တလေးမြို့မှ ဦးရဲမြင့်၊ ကိုညို၊ မစန္ဒာ (ခ) မသန္တာထွန်း နှင့်ပဲခူးမြို့မှ ဦးကျော်ခင်တို့ ၈ ဦးကိုဖမ်းဆီးခဲ့ခြင်းဖြစ်ကြောင်း သိရ သည်။

ယင်းဖမ်းဆီးခံရသူများတွင် ကိုညို ၊ မစန္ဒာနှင့် ဦးဃောသိတ တို့သာ NLD အဖွဲ့အား အကူအညီတောင်းသဖြင့် ရှေ့နေငှားရမ်း၍ ဥပဒေ၏ အကျိုးခံစားခွင့်ကို ရရှိခဲ့ခြင်းဖြစ်သည်ဟု ရှေ့နေဦးကျော်ဟိုးက ပြောသည်။

“အဲ့ဒီအကျဉ်းသားတွေကို ရှေ့နေလိုက်ပေးမယ်ဆိုပြီးသွားပြောတော့ SB ရဲတွေက ကျနော်တို့ကို ခင်ဗျားတို့နဲ့ မဆိုင်ဘူးဆို ပြီး မောင်းထုတ်တယ်၊တွေ့ခွင့်မပေးဘူး”ဟု ၎င်းကဆိုသည်။

ကိုညိုနှင့် မစန္ဒာတို့ကို အင်းစိန်ထောင်တွင်းထောင်ဒဏ်ကျခံနေသည့် NLD လူမှု့အထောက်အကူအဖွဲ့မှ ဒေါ်ချိုက အကူအညီ ပေးသည့်အတွက် ရှေ့နေလိုက်ပါဆောင်ရွက်ခွင့် ရရှိခြင်းဖြစ်ကြောင်း၊ ဦးဃောသိတ အမှုအတွက် တခြားသော ရှေ့နေ တဦးဖြစ် သည့် ဦးကျော်ဌေးက လိုက်ပါ ဆောင်ရွက်ပေးနေကြောင်းသိရသည်။

သာသနာ့ဝေပုလ္လာရာမ အနောက်တိုက်ကျောင်း တည်ရှိရာ ပခုက္ကူ၌ ၂၀၀၇ ခုနှစ် စက်တင်ဘာ ၅ရက်နေ့တွင် သံဃာ ၅၀၀ ကျော် က မေတ္တာပို့ လမ်းလျှောက် ဆန္ဒပြခဲ့ရာ လုံခြုံရေး တပ်ဖွဲ့ဝင်များက အကြမ်းဖက် ဖြိုခွဲခဲ့သည်။ သံဃာ ၃ ပါးကို ဓာတ်တိုင်တွင် တုပ်နှောင်ကာ ရိုက် နှက်ခဲ့သောကြောင့် မြန်မာပြည် အနှံ့အပြား မှ ရဟန်း ရှင်လူများ စိတ်ဆိုးဒေါသထွက်ခဲ့ကြသည်။

ထိုဖြစ်ရပ်ကို စစ်အစိုးရက ပြန်လည် တောင်းပန်ခြင်း မပြုသဖြင့် နိုင်ငံအနှံ့မှ သံဃာတော်များက ၂၀၀၇ စက်တင် ဘာ ၁၈ ရက်မှစ၍ အာဏာပိုင် တို့ကို ပတ္တနိကုဇ္ဇန ကံဆောင် သပိတ်မှောက်ခဲ့သည်။ ထို့ပြင် သံဃာတော်များ မေတ္တာပို့ ဆန္ဒပြ ကြွချီရာမှ လူထု လှုပ်ရှားမှု အသွင်သို့ ကူးပြောင်းခဲ့သည်။ အာဏာပိုင် တို့က စက်တင်ဘာ ၂၆ နှင့် ၂၇ ရက်နေ့တို့တွင် ရန်ကုန်မြို့ရှိ ဆန္ဒပြမှုများကို အကြမ်းဖက် ပစ်ခတ် ဖြိုခွင်းကာ သံဃာနှင့် သီလရှင်များကို ဖမ်းဆီး တရားစွဲပြီး နှစ်ရှည် ထောင်ဒဏ်များ ချမှတ် လိုက်သည်။

စစ်အစိုးရ အနေဖြင့် ယခုကဲ့သို့ စွပ်စွဲခံရပြီး ဖမ်းဆီးထားသူများအား ဥပဒေနှင့်အညီ မိသားစုနှင့် ဆက်သွယ်ခွင့်၊ ရှေ့နေငှားရမ်းခွင့် ပေးအပ်ရမည်ဖြစ်ကြောင်း၊ ထိုသို့သော ဥပဒေ၏ အကျိုးခံစားခွင့် မရရှိခြင်းသည် လူ့အခွင့်အရေး ဆုံးရှုံးမှုပင်ဖြစ်ကြောင်း၊ယခုကဲ့သို့ ရှေ့နေမပါဘဲ စီရင်ချက်ချမှတ်ခြင်းသည် ဥပဒေကြောင်းအရလည်း တရားမဝင်ကြောင်း ဦးကျော်ဟိုးက သုံးသပ်သည်။

၂၀၀၈ ခုနှစ်အတွင်းကလည်း ၈၈ မျိုးဆက်ကျောင်းသားများအမှု၊ NLD အဖွဲ့ဝင် လွှတ်တော်ကိုယ်စားလှယ် ဒေါက်တာတင်မင်းထွန်း နှင့် ဦးညီပု အမှု၊ ဦးကျင်ရှင်းထန်၏သား ကမ်ခမ်ခုတ် အမှုနှင့် ရခိုင်လူငယ် ကိုတင်ထူးအောင်တို့အမှုများအား အကျိုးဆောင်ရှေ့နေ ငှားရမ်းခွင့် မရရှိဘဲစီရင်ချက်ချမှတ် ခဲ့ခြင်းဖြစ်ကြောင်း သိရသည်။

စာဖတ်သူ ထင်မြင်ချက်များ

အသစ်ရေးရန်

ရှာဖွေရန်

RSS