အကော်ဒီယံအုန်းကျော်ကို ဂီတအစည်းအရုံး တရားစွဲ

သတင်း - ပြည်တွင်းသတင်း သတင်းရင်းမြစ် > မျိူးဝင်းဇော် ကြာသပတေးနေ့၊ ဖေဖေါ်ဝါရီလ ၄ ရက် ၂၀၁၀ ခုနှစ်

PDF ဖိုင်ရယူရန် Array ပရင့်ထုတ်ရန် Array အီးမေးလ်ပို့ရန်

မြန်မာနိုင်ငံ ဂီတအစည်းအရုံးပိုင် အဆောက်အအုံမှ ဖယ်ရှားပေးရန် အကော်ဒီယံအုန်းကျော် မိသားစုကို ဂီတအစည်းအရုံးက တာမွေ တရားရုံးတွင် တရားစွဲဆို ထားသည်။

ဂီတအစည်းအရုံးကော်မတီ အဖွဲ့ဝင်တဦးက “အဲဒီ မြန်မာနိုင်ငံ ဂီတအစည်းအရုံး အဆောက်အအုံမှာ ကျနော်တို့ အပြည့်အဝ ပြောင်းရွှေ့ အလုပ်လုပ်ဖို့ လိုတယ်။ အဲဒီမှာ အကော်ဒီယံ အုန်းကျော်မိသားစုဝင်တွေက လူနေအိမ်အဖြစ် အသုံးပြုပြီး နေနေကြတယ်။ ဒါနဲ့ ဘယ်လိုလုပ်ရမလဲဆိုပြီး ပြန်ကြားရေးဝန်ကြီး ဗိုလ်မှူးချုပ်ကျော်ဆန်းကို တင်ပြတော့ သူက တရားစွဲ ဆိုတာနဲ့ ခု အကော်ဒီယံအုန်းကျော် မိသားစုတွေကို ဖယ်ရှားပေးဖို့ တရားစွဲ လိုက်တာဖြစ်တယ်” ဟု ပြောသည်။

ဂီတအစည်းအရုံးမှ အကော်ဒီယံအုန်းကျော်ကို ဖယ်ရှားပေးရန် မေတ္တာရပ်ခံထားသည်မှာ ကြာပြီဖြစ်ကြောင်း၊ ထိုသို့ မေတ္တာရပ်ခံမှုကို အကော်ဒီယံအုန်းကျော်က အတွင်းရေးမှူး (၁) ထံ စာတင်ထားကြောင်း အခြား တေးဂီတ ထုတ်လုပ်အလွှာမှ ကော်မတီဝင်တဦးက ပြောသည်။

“ဒီလို စာရေးတင်ပြ တိုင်တန်းတဲ့အတွက် ဗိုလ်မှူးချုပ်ကျော်ဆန်းက ဒေါသထွက်ပြီး ဂီတအစည်းအရုံးကနေတဆင့် တရားစွဲ ဖယ်ရှားခိုင်းတာ ဖြစ်တယ်” ဟု ၎င်းက ပြောသည်။

ယင်းစာတွင် အဆိုပါအဆောက်အအုံကြီးကို သူကိုယ်တိုင်ကမကထလုပ် ဆောက်ခဲ့ခြင်းဖြစ်ကြောင်း၊ ထိုအကြောင်း ကြေးသွင်းစာ ရေးထိုးပြီး အဆောက်အအုံ မြေညီထပ်တွင် ဖော်ပြထားကြောင်း၊ သူ့အနေဖြင့် နိုင်ငံတော်ကို အလုပ်အကျွေးပြုခဲ့သည်များကို ထောက်ထားပြီး ဆက်လက်နေထိုင်ခွင့်ပြုစေလိုပါကြောင်း၊ သူ ဂီတအစည်းအရုံးကို တာဝန်ယူစဉ်က ကော်မတီအဖွဲ့ဝင်များ၊ အလုပ်အမှုဆောင် ဥက္ကဋ္ဌ စသည်တို့ကို မဲစနစ်ဖြင့် ရွေးချယ်တင်မြှောက်ခဲ့ကြောင်း၊ သို့သော် နောက်ပိုင်း ပြန်ကြားရေးဝန်ကြီး ဗိုလ်မှူးချုပ်ကျော်ဆန်းက ဂီတအစည်းအရုံး တာဝန်ရှိသူများကို သူ့သဘောကျ ခန့်အပ်ခဲ့ကြောင်း စသဖြင့် ရေးသားခဲ့သည်ဟု ၎င်းက ဆက်လက်ရှင်းပြသည်။

မြန်မာနိုင်ငံ ဂီတအစည်းအရုံးအဆောက်အအုံကို ၁၉၉၁ ခုနှစ်က အကော်ဒီယံအုန်းကျော် ကိုယ်တိုင် ကမကထလုပ်ပြီး ဂီတလောကသားများ ထည့်ဝင်သည့် အလှူငွေဖြင့် သုံးထပ် အဆောက်အဦကြီး ဆောက်လုပ်ခဲ့ခြင်းဖြစ်ကာ ငွေကျပ်သိန်း (၆ဝဝ) ကျော် ကုန်ကျခဲ့ကြောင်း၊ ဆောက်လုပ်ပြီးစဉ်မှစ၍ အကော်ဒီယံအုန်းကျော် မိသားဝင်များ အဆိုပါ အဆောက်အအုံ တထပ်ကို ငှားရမ်းနေထိုင်ခဲ့ခြင်းဖြစ်ကြောင်း သိရသည်။

ယခု နှစ်ပေါင်းများစွာ ကြာလာပြီး နောက်ပိုင်း တက်လာသည့် ဂီတအစည်းအရုံး ကော်မတီဝင်များက အဆောက်အအုံ တခုလုံးကို အစည်းအရုံးအတွက် အသုံးပြုလိုသောကြောင့် ယခုကဲ့သို့ နေထိုင်ရာမှ ဖယ်ရှားခိုင်းခြင်း၊ တရားစွဲဆိုခြင်း အဆင့်အထိ ဖြစ်လာခဲ့ခြင်းဖြစ်သည်။

ရန်ကုန်မြို့မှ နာမည်ကြီး တေးရေးဆရာတဦးကမူ ယခုကိစ္စသည် စစ်အာဏာပိုင်များနှင့် ပလူးပလဲ လုပ်ချင်သည့် အဆိုတော်၊ တေးရေး၊ ဒါရိုက်တာ၊ ရုပ်ရှင်မင်းသား၊ မင်းသမီး စသည်တို့အတွက် သင်ခန်းစာယူစရာ ဖြစ်ကြောင်း ပြောသည်။

၎င်းက “စစ်အာဏာရှင်တွေဆိုတာ သူတို့ကို ဘယ်လိုပဲ အလုပ်အကျွေးပြုပြု၊ ပြည်သူတွေကို ဘယ်လောက်ပဲ သစ္စာမဲ့ပြပြ သူတို့ အသုံးမလိုတော့ဘူး ဆိုရင်တော့ ဘယ်လိုနည်းနဲ့မှ မျက်နှာထောက်ထားတာမျိုး မရှိခဲ့ဘူး။ အဲဒီအချိန် ဒီအနုပညာရှင်ကို ပြည်သူတွေကလည်း မုန်းတီးနေပြီဖြစ်လို့ ဘဝသေသွားပြီဖြစ်တယ်” ဟု ပြောသည်။

စာဖတ်သူ ထင်မြင်ချက်များ

အသစ်ရေးရန်

ရှာဖွေရန်

RSS