မြန်မာတောင်းစားသူများ မဲဆောက်တွင် ဖမ်းဆီးခံရပြန်

သတင်း - ပြည်တွင်းသတင်း သတင်းရင်းမြစ် > ရဲရင့် သောကြာနေ့၊ မတ်လ ၅ ရက် ၂၀၁၀ ခုနှစ်

PDF ဖိုင်ရယူရန် Array ပရင့်ထုတ်ရန် Array အီးမေးလ်ပို့ရန်

မဲဆောက်မြို့နယ်အတွင်း နိုင်ငံခြားခရီးသွားများနှင့် ပြည်တွင်းခရီးသွားများကို အနှောင့်အယှက်ဖြစ်စေသည့်အတွက် မြန်မာတောင်းစားသူ (၁၀၀) ကျော်ကို မြို့နယ်အုပ်ချုပ်ရေးအဖွဲ့က ဖမ်းဆီးပြီး မြန်မာနိုင်ငံ မြဝတီဘက်ခြမ်းသို့ ပြန်ပို့လိုက်သည်။

ဖမ်းဆီးမှုနှင့်ပတ်သက်၍ မဲဆောက်မြို့ပိုင် နိုင်ကစ်တီဆတ်က် တိုမွန်ဆတ်က်က “မဲဆောက်ကို အလည်လာတဲ့ နိုင်ငံခြားသားခရီးသွားတွေနဲ့ ပြည်တွင်းခရီးသွားတွေက တာ့ခရိုင်ဝန်ရုံးနဲ့ မဲဆောက်မြို့ပိုင်ရုံးကို ဒီကိစ္စနဲ့ ပတ်သက်ပြီး တိုင်ကြားလာတဲ့အတွက် တောင်းစားသူတွေကို ဖမ်းဆီးပြီး မြန်မာဘက် ပြန်ပို့တာ ဖြစ်တယ်” ဟု ဒေသခံ သတင်းထောက်များကို ပြောသည်။

မဲဆောက်စျေးမှ ဆိုင်ပိုင်ရှင်တဦးက “ကျမတို့ဆိုင်မှာ စျေးလာဝယ်တဲ့ အင်္ဂလိပ်တွေ၊ အခြားနယ်ကလာတဲ့ ထိုင်းတွေကို မြန်မာတောင်းစားသူတွေက ဟလို၊ ဆဝါဒီးလို့ နှုတ်ဆက်ပြီး ပိုက်ဆံတောင်းကြတယ်။ အင်္ဂလိပ်တွေဆိုရင် လက်ဆွဲ အကျႌဆွဲပြီး ပိုက်ဆံမပေးရင် လက်မလွှတ်တာတွေ ဘာတွေရှိတယ်။ ထိုင်းတွေကိုကျတော့ ဆိုင်ထဲက ထွက်လို့မရအောင် ဆိုင်ပေါက်ပိတ်ပြီး ပိုက်ဆံတောင်းတာတွေရှိတယ်။ ဒါကြောင့် ဒီလူတွေကိုဖမ်းဖို့ ကျမတို့က တိုင်ရတာဖြစ်တယ်” ဟု ပြောသည်။

အဖမ်းခံရသူများထဲတွင် သက်ကြီးရွယ်အိုနှင့် ကလေးငယ်များအပြင် ကိုယ်ရေပြားရောဂါ ဆိုးဆိုးရွားရွား ခံစားနေရသူများနှင့် ဒုက္ခိတများပါရှိပြီး ၎င်းတို့ကို ယနေ့ညနေပိုင်းတွင် မဲဆောက်မြို့ပိုင်ရုံးမှတဆင့် မြဝတီဘက် ပြန်ပို့လိုက်ခြင်းဖြစ်သည်။

အဖမ်းခံရသူ မြန်မာစစ်တပ်မှ စစ်မှုထမ်းဟောင်း ဒုက္ခိတ တဦးဖြစ်သူက “ကျနော်ဒီမှာ တောင်းတာ ကြာပြီ။ တနေ့ကို ဘတ် (၁၀၀) ကျော် (၂၀၀) နေ့တိုင်းရပါတယ်။ ဗမာပြည်မှာ ကျန်ခဲ့တဲ့ သားသမီးတွေကို ကျနော်ဒီကနေ ထောက်ပံ့ပေးနေတာပါ” ဟု ပြောသည်။

ယခုဖမ်းဆီးထားသူများကို မြန်မာနိုင်ငံဘက် ပြန်ပို့ခြင်းမှလွဲ၍ အခြားနည်းလမ်းများဖြင့် အရေးယူရန် လုပ်ပိုင်ခွင့် အပြည့်အဝ မရှိသေးသည့်အတွက် ဖမ်းဆီးပြန်ပို့ခြင်းကိုသာ လုပ်ဆောင်နေရသည်ဟု မဲဆောက်မြို့ပိုင်က ပြောသည်။

ဖမ်းဆီးမှုမှ လွတ်မြောက်သွားသူတဦးက “မဲဆောက်မှာ တောင်းတဲ့မြန်မာတွေဟာ ကျန်းမာရေး မပြည့်စုံတဲ့လူတွေ၊ သက်ကြီးရွယ်အိုတွေ၊ ဒုက္ခိတတွေ၊ အနူတွေ၊ မျက်မမြင်တွေ၊ ကလေးငယ်တွေ ပါတယ်၊ အားလုံး အောက်ဘက်ကပါ။ မြဝတီက လူတွေမဟုတ်ပါဘူး။ အားလုံးဟာ အိုးမဲ့အိမ်မဲ့တွေပါ။ မြဝတီပြန်ပို့ပြီးတာနဲ့ အားလုံးက မဲဆောက်ကိုပဲ ပြန်လာကြမှာပါ။ မြဝတီမှာ သူတောင်းစားတွေကို ဧည့်စာရင်းလက်မခံပါဘူး၊ အိမ်ငှားနေလို့လည်းမရပါဘူး။ မြန်မာပြည်မှာ တောင်းတာနဲ့ ထိုင်းမှာတောင်းတာက ဆီနဲ့ရေလိုကွာတယ်၊ အဖမ်းခံရလည်း ခဏပါပဲ” ဟု ပြောသည်။

မဲဆောက်အာဏာပိုင်များမှ မဲဆောက်မြို့၌ မြန်မာတောင်းစားသူများကို အလားတူ ဖမ်းဆီးမှုမျိုး ယခင်က ပြုလုပ်ခဲ့သော်လည်း ထိရောက်သည့် အပြစ်ပေးအရေးယူမှု မလုပ်နိုင်သည့်အတွက် တောင်းစားသူများ နှိမ်နင်းရေး မအောင်မြင်ဘဲ
သံသရာလည်နေသည်ဟု မဲဆောက်စျေးမှ လျှပ်စစ်ပစ္စည်းဆိုင်ပိုင်ရှင်တဦးက ပြောသည်။

ယခင်က ဖမ်းဆီးမှုများတွင် တောင်းစားသူ ဆယ်ဂဏန်းခန့်သာ ဖမ်းဆီးရမိပြီး ယနေ့ဖမ်းဆီးမှုကို အင်အားအလုံးအရင်းနှင့် ပိုက်စိပ်တိုက်ဖမ်းဆီးသောကြောင့် တောင်းစားသူများကို ရာနှင့်ချီ၍ ဖမ်းမိခြင်းဖြစ်သည်ဟု မဲဆောက်စည်ပင်ရဲတဦးက ပြောသည်။

စာဖတ်သူ ထင်မြင်ချက်များ

အသစ်ရေးရန်

ရှာဖွေရန်

RSS